Í skúlanum lærir tú nógv ymiskt. Tú fært frálæru í ymsum lærugreinum, so sum føroyskt, rokning og søgu. Og tú lærir at arbeiða saman við øðrum næmingum og nógv annað. Tað, tú lærir í skúlanum, kanst tú brúka í tínum lívi nú og í framtíðini. Tosa saman við tín síðumakkara um dømir um okkurt, sum tit hava lært, og hvat tit kunnu brúka tað til. Kanska lærir tú eisini nakað, sum tú heldur, at tú ikki kanst brúka til nakað.

Norska ungdómsrøðin SKAM er ein gáva til undirvísingina í grannamálum í øllum Norðurlondum. SKAM hevur gjørt norskt mál kult millum norðurlendskan ungdóm, og hevur styrkt kensluna av at vera partur í einum størri norrønum mál- og mentanarfelagsskapi. SKAM tekur upp sonn og viðkomandi evni, sum norðurlendsk ung kenna seg aftur í. Heitið SKAM sipar til ta skommina, nógv ung kenna við ikki at vera perfekt og kunna liva upp til egna fullkomna fyrimynd. Julie Andem, leikstjóri og leikritahøvundur, hevur skapt eina røð, har ung kunnu spegla sær í leiklutum, ið ikki eru fullkomnir, og har tey ungu hjálpast at við at tora at halda fast um tað, tey eru, og tað tey meina. SKAM varð sent á NRK frá 2015-2017. Málbólkurin var upprunaliga 16 ára gamlar gentur, men sendirøðin hevur rakt nógv breiðari, og hevur nú ein stóran fjepparaskara í øllum Norðurlondum. “Mennesker trenger mennesker” er eitt kent sitat úr SKAM, ið lýsir høvuðsboðskapin í sendirøðini um, at tað, vit øll hava tørv á, er at vera partur av einum felagsskapi. Tey ungu í SKAM leita sær styrki í vinaløgunum, og tey stuðla hvørjum øðrum í at vera tey sjálvi. “Kvart et menneske er en øy” er er eitt annað sitat, ið fortelur, at vit menniskju eru eins og oyggjar, ið einans kunnu samskifta umvegis málið. Vit mugu tosa saman um okkara trupulleikar. Tað læra leiklutirnir í SKAM okkum.