Litla norður (leiðbeiningar fyrir kennara)

KYNNING

Námsefnið Litla norður er safn af þekktum teiknimyndum og lögum fyrir yngstu nemendurna í skólanum. Myndirnar eru aðgengilegar, verkefnin létt og auðvelt að leggja þau fyrir í bekknum. Nemendur kynnast meðal annars hinum sígildu, dönsku myndum um Vitello og Aben Osvald, Einari Áskatli frá Svíþjóð og höfundi norska þjóðsöngsins, Bjørnstjerne Bjørnson.

MARKMIÐ

Markmið námsefnisins er að nemendur á yngsta bekkjarstigi kynnist nágrannamálunum dönsku, norsku og sænsku á einfaldan og aðgengilegan hátt. Þeir fá tækifæri til að sjá, hlýða á og syngja með á viðkomandi málum. Efnið má einnig nýta í samstarfi við tónlistarkennarann ef kennurum líst svo á.

UPPBYGGING NÁMSEFNISINS

Námsefnið samanstendur af stuttum teiknimyndum, barnasöngvum auk eins ljóðs og fylgja verkefni með. Hægt er að styðjast við textana, sem fylgja myndunum og eru á níu tungumálum, ef kennari telur að þeir gagnist nemendum. Ekki er nauðsynlegt að fara yfir allt efnið. Norden i Skolen leggur til tvær leiðir: Sígilt norrænt efni og Norrænn kveðskapur. Kennurum er frjálst að velja eina af leiðunum eða þá einstaka sögur, allt eftir því hvað hentar bekknum best hverju sinni.

Leið 1: 'Sígilt norrænt efni'

• Veljið sænsku teiknimyndina 'Alfons Åberg', dönsku teiknimyndina 'Vitello graver et hul' og norsku teiknimyndina 'Olavs første skitur'. Aðalpersónur allra þriggja myndanna eiga það sameiginlegt að vera forvitnar um heiminn í kringum sig í barnslegri einfeldni. Þar sem myndirnar eru hver frá sínu landi gefa þær tilefni til frekari umræðu um það sem er líkt og ólíkt milli landanna.

Leið 2: 'Norrænn kveðskapur'

• Veljið norska ljóðið ‘Treet’, sænska lagið ‘Vem kan segla förutan vind’ og danska lagið ‘Sørøversangen’. Ljóð og lög geta nýst vel til að kynnast tungumálunum og út frá þeim er hægt að ræða um það sem er frábrugðið milli málanna. Ef kennarar kunna fleiri norræn barnalög er tilvalið að bæta þeim við. Hér má einnig styðjast við efni úr þemanu ‘Norðurlönd syngja’.

VERKEFNI OG HLJÓÐORÐABÓK

Verkefni fylgja öllu efninu, sem bæði má vinna sjálfstætt eða í hóp. Í þeim er lögð áhersla á mál, menningu og hefðbundna textagreiningu.

Sérstök hljóðorðabók er tengd textunum og er undir nemendum komið hvort þeir nýta sér hana eður ei. Með því að ýta á þau orð, sem eru appelsínugul, opnast lítill kassi, þar sem heyra má orðin og sjá þýðingu þeirra á bókmáli, nýnorsku, dönsku og sænsku.