Plastikkimerngit 5 millimeterit ataakkaat mikroplast-imik taaneqartarput. Tassa plastikkiupput mikisuaqqat isaannarmik takujuminaassinnaasut. Ilai uagut inunniik takuneqarsinnaanngiivipput. Mikroplast-it assigiinngitsunit marlunniinngaanneerput:
- Mikroplast-i pingaarneq, plastikkiaqqatut sanaaq ilaatigut kumiutitut sunniuteqarniassammat cremeniittartoq, kigutit qaqorsaataanni tarngutinilu.
- Mikroplast-i pingaannginneq, plastikkimineeraasut allani sanaaniit katannikut s.i. atisat errortakkat imlt. plastikkimerngit anginerusut nungusarneqarnikut.
Plastikkimik mingutsitsinerpaap sorliunerata oqaatigineqarnissaanut ajoraluartumik ilisimasat naammanngillat. Kisianni immap uumasuisa immamiittullu uumassusillit taama pinianngikkaluarlutik mikroplast-i nerisaraat ilisimavarput, tamatumuuna plastikki inuussutissat uiguleriiaannut ilannguttarpoq. Plastikkip inuussutissat uiguleriiaanniinnera qanoq kinguneqartitsisinnaanera suli nalorninarpoq, kisianni Naalagaaffiit Peqatigiit nalunaarutigaat immami plastikkimik mingutsitsineq ”nunarsuarmiunut tamanut atuuttumik eqqasuutaasoq”.
Immap sarfai peqqutaallutik mikroplast-it plastikki suppamik taaneqartartumi katersuupput. Tallimanik supparujussuarnik mikroplast-inik kimittussuseqaqisunik immap qaavani puttasoqarpoq. Suppat ukua katillugit Afrikatut angitigisumik arealeqarput. Taakku pilersarput pissutigalugu immap sarfaasa eqqakkat qeqqanut milluguttarmagit taama ilillunilu plastikkip millugussaajunnaarnissaa ajornarsisarpoq.
Loginerit takusaqarnerorusullutit
