Nunarsuatsinni innaallagissamik nukissamillu atuinernit annertusiartuinnartunit CO2-mik aniatitsinerit mingutsitsinerillu uuliamut, gassimut aamarsuarnullu, tassaasut nukissiutigut salliusut, taarsiutissaannik ilisimasassarsiortorpassuit ujaasiitippaat. Nukissamilli tunisassiornermi aniatitsinitsinnut killilersueriaatsit allat aamma nassaassaapput. Periuseq ataaseq taaneqartarpoq ”innaallagissamik aaqqissuussineq poqissusilik”.
Innaallagissamik aaqqissuussineq poqissusilik - Smart Grid
Innaallagissamik aaqqissuussineq poqissusilik tuluttut taaneqarajunneruvoq Smart Grid. Innaallagissamik aaqqissuussinermi immikkoortunik tamanik aqutsinermi ataatsimoortillugit taaguutitut atorneqartarpoq, tassa nukissiorfinni anorisaatinik seqinermillu innaallagissiuutinik tunisassiornermi, innaallagissap aqqutaasigut ingerlatitsinermi attuinermillu aqutsinermi.Anorleraangat imaluunniit seqinneraangat Nunani Avannarlerni innaallagiaq annertusiartuinnartoq anorisaatit aammalu seqinermit nukissiutit atorlugit tunisassiarineqartarpoq. Innaallagiaq taanna CO2-mik aniatitsinani tunisassiarineqarpoq taamaalillunilu aamarsuarnit imaluunniit gassimik ikummateqarluni tunisassiornermut sanilliullugu avatangiisinut pitsaanerulluni. Ajornartorsiulli tassaavoq innaallagissamik toqqortueriaaseq pitsaasoq suli nassaarinnginnatsigu taamaalullutalu nukissaq atorfissaqartileraangatsigu, anorlinngippat seqinninngippalluunniit, taava innaallagissamik aaqqissuussinerput allatut aaqqissuuttariaqarparput, nukissaq pissarsiassaatillugu atorsinnaanngorlugu taamatullu qulisimappat atorsaappalluunniit annikinnerusumik atuilluta. Taamaattumik anorimit seqinermillu nukissaq, nukissamik allanngorartumik taaneqartarpoq.
Seqineq anorilu nukissamik tunisassiornitsinni atorluarusukkatsigit nunat avannarliit nukissamik aqqissuussinerat eqaallisartariaqarpoq. Nukissiorfiit ullumikkut innaallagissamik taannaajuartumik tunisassiortussatut naleqqussagaapput, sakkortusissagaanni sakkukillisissagaanniluunniit imaannaanngitsuulluni, soorlu atomimik nukissiorfimmi – killormut gassimik imaluunniit imermik nukissiorfimmi eqaannerulluni. Nukissaq anorimit seqinermillu nukissaq annerusoq pilersinneqarpat ikkuffimmi innaallagiaqassappat, taava aamma pingaartuuvoq nukissiorfiit ikikkasuarsinnaanissaat qamikkasuarsinnaanissaallu. Pineqartoq tassaavoq innaallagissamut aqqutit poqinnerulersinnissaat. Tassunga atatillugu tamanna isumaqarpoq, qarasaasiat uuttuutillu tamatigut nakkutigissagaat, nukissaq qanoq annertutigisoq atorneqarnersoq, qanorlu annertutigisoq tunisassiarineqarnersoq, taavalu anorisaatinit seqinermillu nukissiuutinit tunisassiorneq naammanngippat nukissiorfinnut nalinginnaasunut piaartumik nalunaaruteqarluni.
Atuisartunut immikkut ataatsiakkaanut Smart Grid allarluinnarmik isumaqarpoq. Innaallagissamik atuineq tunisassiarineqartumut naleqqussarsinnaaniarlugu suliffeqarfiit inoqutigiillu nalinginnaasut piffissami aalajangersimasumi nukissamik atuisarnissaannut periutsit inerisarneqassapput. Soorlu Smart Grid-ip nakkutigissavaa illit najugaqarfinni innaallagiaq qanoq annertutigisoq annikitsigisorluunniit atorneqarsinnaanersoq. Innaallagiaqarluarpat qerititsivik nillataartitsivilluunniit nillernerulersinnaapput – nukissamik atuinatik sivisunerusumik qaminngasinnaaniassammat nukissamik piareersimasoqanngippat. Smart Grid-ip aamma biilinit innaallagissamoortunit batteri, imermik uunnaavimmit innaallagissamoortumit kissarneq atorluarsinnaavai imaluunniit sumiiffinni allani atuineq qaffasippat imaluunniit innaallagiaqarpallaanngippat suliffeqarfinni tunisassiorneq akunnialunni unitsillugu.
Innaallagissamik uuttuutit ungasissumit atuarneqarsinnaasut
Suliffeqarfiit atuisartullu Smart Grid-imut ilanngunneqarsinnaanerinut tunngavissaq pingaarutilik tassaavoq innaallagissamik uuttuutit automatiskiusut ikkussornissaat, taakku tamatigut nakkutigissavaat innaallagiaq qanoq annertutigisoq atorneqarnersoq. Suliassaq taanna Nunani Avannarlerni tamani ingerlanneqarpoq ukiunilu tulliuttuni qulini ingerlanneqassalluni. Innaallagissamik aaqqissukkat allanngortinnissaat imaannaanngitsuupput aningaasarpassuarnik naleqarlutik eqqarsaatigilluagaassallutillu, qamittuunnginniassagatta. Taamaattumik nutaaliorneq sivisusarpoq.
Loginerit takusaqarnerorusullutit
