Teaksta
Video
Spealat ja stoahkan
Gilvu
Jietnabádden
Bargobihttá
Oahpaheaddjebagadus

Vajálduhttán beassansáni?

 

10-02-2017

Ođđa sámegiel oahpahusávdnasat nannejit davviriikkalaš oktavuođa

Ođđa sámegiel oahpahusávdnasat nannejit davviriikkalaš oktavuođa

Dál ožžot sámi oahppit ja oahpaheaddjit nuvtta oahpahusávdnasiid davviriikkalaš kultuvrra birra iežaset gillii: guovvamánu 10. beaivvi boahtá ođđa almmuhus sámegillii dan stuorra oahppoportálas Norden i Skolen (www.nordeniskolen.org), mii juo geavahuvvo 8.000 oahpaheddjiin buot davviriikkain.

 

- Ulbmil Norden i Skolen-neahttasiidduin lea buktit oahpu davviriikkalaš gielaid ja kultuvrraid birra, ja addit mánáide ja nuoraide vejolašvuođa hupmat ja gulahallat riikkarájiid badjel, čilge Norden i Skolen-prográmmahoavda Thomas Henriksen, gii gulla Davviriikkalaš Servviide.

Thomas Henriksen illuda almmuhit davvisámegiel-oahppoportála, Tråante 2017-doaluin, Scandic Lerkendal hoteallas bearjadaga, guovvamánu 10. beaivve dii. 16-16.30.

Norden i Skolen-neahttasiiddus gávdnojit oahpahusávdnasat davviriikkalaš gielaid ja kultuvrraid birra ja maiddái fáttát dego dálkkádat ja bistevašvuohta. Oahpaheaddjit davviriikkain sáhttet geavahit dáid ávdnasiid iežas oahpahusain. Neahttasiiddus leat maid oktasaš oahppidoaimmat gos oahppit besset ságastallat eará mánáidguin ja nuoraidguin davviriikkain, nu go neahttaságastallan, ustitluohkát ja dálkkádatgilvvut.

Dan ođđa sámegiel oasis ožžot oahppit buot davviriikkain vejolašvuođa oahpásmuvvat sámi kultuvrrain, dadjá Espen Stedje, Davviriikkalaš Servviid váldočálli: - Sámi álbmot ja sámi kultuvra lea dehálaš oassi davviriikkalaš servodagas. Danne lea dehálaš leat mielde nannet mánáid ja nuoraid máhtu sámiid birra.

Sámiráđi presideanta Áile Javo dadjá:
- Mun lean movttet go Norden i Skolen dál lea jorgaluvvon sámegillii. Lea váilevašvuohta sámegiel oapponeavvagiin ja skuvlaávdnasiin, danne lea erenoamážit dehálaš ahte dákkar resurssat jorgaluvvojit sámegillii. Lea movttidahtti ahte mánát eará riikkain dáppe davvin ožžot gullat sámi kultuvrra ja sámegiela birra, das go mii diehtit ahte váilo máhttu olusiiguin eanetloguoálbmogis. Mun sávan ahte dieinna lágiin ođđa buolvvat ožžot buoret ipmárdusa dasa ahte sápmelaččat leat dehálaš oassi davviguovlluin.


Jus áiggut dieđuid Norden i Skolen birra:
Thomas Henriksen, prográmmahoavda Foreningerne Nordens Forbund, tlf. +45 26116267, thomas@fnfnorden.org - www.nordeniskolen.org


Jus áiggut dieđuid Foreningen Norden Norge birra:
Heidi Lønne Grønseth, oahppo ja giella ráđđeaddi, tlf.: +47 98676212, heidi@norden.no - www.norden.no

Sámegiel Norden i Skolen-neahttasiddu preassagova sáhttá viežžat dás.

 

DIEĐUT OAHPPOPORTÁLA NORDEN I SKOLEN BIRRA:

* Norden i Skolen ásahuvvui 2011:is Davviriikkalaš Searvvis, ja buktá dál oahpahusávdnasiid ja oktasaš doaimmaid davviriikkalaš skuvlaohppiide ovcci gillii: dánskkagillii, suomagillii, fearsullogillii, ruonáeanangillii, islándagillii, davvisámegillii, girjedárogillii, ođđadárogillii ja ruoŧagillii.

* Davviriikkalaš Searvvit lea bellodatpolitihkalaš sorjjasmeahttun miellahttoorganisašuvdna, mas lea ulbmilin nannet ja ovdánahttit davviriikkaid álbmotlaš ovttasbarggu.

* Norden i Skolen lea portála mas leat oahpahusávdnasat vuođđoskuvllaide, ja ruhtaduvvo Davviriikkalaš Searvvis, Davviriikkalaš Ministtarráđis, Davviriikkalaš Giellakoordinašuvnnas, Nordplus Davviriikkalaš Gielas ja maiddái eará davviriikkalaš foanddain.

* Norden i Skolen lea portála buot davviriikkaide. Sámi álbmot ja sámi kultuvra lea dehálaš oassi oktasaš davviriikkalaš jurddahanmálles ja identitehtas.

* Norden i Skolen sámegillii lea heivehuvvon oahpaheddjiide ja ohppiide geain lea davvisámegiella eatnigiellan dahje nubbigiellan, ja lea veahkkin dahkat ahte oahpahusávdnasat leat olámuttus sámi ohppiide iežaset gillii vai sii sáhttet geavahit neahttasiiddu ja, seamma ládje go eará davviriikkalaš oahppit, oažžut máhtu davviriikkalaš kultuvrra birra.

* Seammás ožžot oahppit dain eará davviriikkain eanet máhtu sámiid birra. 
Omd. ustitluohkkádoaimmaid bokte ja dálkkádatdoaimmain nu go Davviriikkalaš plastihkkagilvu ja maiddái go lea Davviriikkalaš neahttaságastallan mas buot oahppit besset čálašit guhtet guimmiineaset Davviriikkalaš Beaivvi njukčamánu 23. beaivvi.

* Ulbmil Norden i Skolen-neahttasiidduin lea maiddái nannet davviriikkalaš ohppiid gelbbolašvuođa daid stuoramus ránnjágielain – dánskkagiella, dárogiella ja ruoŧagiella.

* Sámegiel jorgalus Norden i Skolen-neahttasiiddus lea ruhtaduvvon doarjagiin Davviriikkalaš Ministtarráđi árktalaš ovttasbargoprográmmain 2015-2017, mii hálddašuvvo davviriikkalaš dutkaninstituhtas Nordregio.